കള്ളങ്ങളുടെ പെരുമഴക്കാലം
14 NOV, 2018 - 07:23 AM
കള്ളം നൂറു തവണ ആവർത്തിച്ചാൽ നേരാണെന്ന് ജനങ്ങൾ ധരിച്ചുകൊള്ളും എന്ന ആപ്തവാക്യം നാസി ജർമനിയുടെ സ്വേച്ഛാധിപതി അഡോൾഫ് ഹിറ്റ്ലറുടെ പ്രചാരണകാര്യ മന്ത്രി ഗീബൽസിലേക്കാണ് ചേർക്കപ്പെടാറ്. ഫാഷിസ്റ്റ് രാഷ്ട്രീയക്കാരും ഭരണാധികാരികളും മുറതെറ്റാതെ കൊണ്ടുനടക്കുന്ന സമവാക്യംതന്നെയാണത്. ഉള്ളത് ഉള്ളപോലെ ജനങ്ങളെ അറിയിച്ചാൽ തങ്ങളുടെ മിഥ്യാസിംഹാസനങ്ങൾ തകർന്ന് നിലംപൊത്തും എന്ന് അവർക്കറിയാം. ഹിറ്റ്ലറെ മാതൃകാപുരുഷനായി കരുതുന്ന സമകാലിക ഇന്ത്യൻ ഫാഷിസ്റ്റുകളും തങ്ങളുടെ വിനാശകരമായ ലക്ഷ്യപ്രാപ്തിക്കുവേണ്ടി നിരന്തരം നടത്തിക്കൊണ്ടിരിക്കുന്നത് വ്യാജ പ്രചാരണങ്ങളും നിറംപിടിപ്പിച്ച നുണകളുംതന്നെയാണെന്ന് ഒരായിരം അനുഭവങ്ങളിലൂടെ തെളിഞ്ഞുകഴിഞ്ഞതാണ്. ഏറ്റവും പുതുതായി വിശ്വാസ്യത ഒെട്ടാക്കെ ഇപ്പോഴും നിലനിർത്തുന്ന ലോക മാധ്യമമായ ബി.ബി.സി പുറത്തുവിട്ട വിവരങ്ങൾ ഇൗ സത്യത്തിന് അടിവരയിടുകയാണ് ചെയ്യുന്നത്.
നമ്മുടെ നാട് അതീവ ഗുരുതരമായ ഒരു ഘട്ടത്തിലൂടെ കടന്നുപോയിക്കൊണ്ടിരിക്കുകയാണ്. അധികാരവും ഫാസിസവും ചേര്‍ന്ന് നാടിനെ ഇരുണ്ട കാലത്തിലേക്ക് നയിച്ചുകൊണ്ടിരിക്കുകയാണ്. ജനാധിപത്യവും ഭരണഘടനയുമെല്ലാം നാള്‍ക്കുനാള്‍ പിച്ചിച്ചീന്തപ്പെട്ടുകൊണ്ടിരിക്കുകയാണ്. ഇതിനെല്ലാം നേതൃത്വം വഹിച്ചുകൊണ്ട് സംഘപരിവാര്‍ ശക്തികള്‍ അരങ്ങത്തും അണിയറയിലും ഉറഞ്ഞു തുള്ളുകയാണ്.